चीन सरकारका तर्फबाट बाढी तथा पहिरो प्रभावितका लागि दोस्रो खेपको राहत सामग्री र डिएनए (DNA) पहिचान विज्ञसहितको टोली नेपाल आइपुगेको छ। मंगलबार साँझ चिनियाँ सेनाको विशेष विमान काठमाडौंस्थित त्रिभुवन अन्तर्राष्ट्रिय विमानस्थलमा अवतरण भएको हो।
काठमाडौंका लागि चिनियाँ दूतावासका अनुसार, यस विमानमा बाढी-पहिरोका कारण ज्यान गुमाएका नागरिकहरूको पहिचानमा सहयोग पुर्याउन चीनबाट ५ जना डिएनए विज्ञहरू नेपाल आएका छन्। टोलीले विपद्मा परी ज्यान गुमाएका र पहिचान हुन बाँकी शवहरूको डिएनए परीक्षण तथा वैज्ञानिक पहिचानमा नेपाली सुरक्षा निकाय र स्वास्थ्य अधिकारीहरूलाई प्रत्यक्ष सहयोग गर्नेछ।
यसका साथै, विमानमा बाढी र पहिरो प्रभावित क्षेत्रका लागि अत्यावश्यक राहत सामग्रीहरू समेत ल्याइएको छ। चीनले नेपाललाई प्रदान गरेको सहयोगको यो दोस्रो चरण हो । यसअघि पहिलो चरणअन्तर्गत चिनियाँ सेनाका दुई वटा विशाल कार्गो विमानमार्फत ठूलो परिमाणमा उद्धार तथा राहत सामग्री नेपाल भित्र्याइएको थियो ।
नेपालमा हालै आएको विनाशकारी बाढी-पहिरोपछि छिमेकी मुलुक चीनले उद्धार, राहत तथा पुनर्स्थापनाका लागि निरन्तर सहयोग उपलब्ध गराउँदै आएको छ। प्राप्त राहत सामग्रीहरू शीघ्र प्रभावित क्षेत्रमा पठाउने तयारी भइरहेको छ।