पर्वत — पर्वतको जलजला गाउँपालिका–८ स्थित फर्सेमा कालीगण्डकी नदीको बहाव अचानक बढेर बस्तीमा पस्दा २५ वटा घर बगेका छन्। बाढीका कारण स्थानीयमा त्रास फैलिएको छ भने बस्तीका अन्य घरहरू समेत जोखिममा परेका छन्।
प्रहरीका अनुसार ११ गते बिहान करिब ८ बजे कालीगण्डकी नदीको बहाव बढेपछि नदीको पानी बस्तीमा प्रवेश गरेको थियो। फर्सेमा रहेका करिब ८० घरमध्ये २५ वटा घर बाढीले बगाएको प्रारम्भिक जानकारी प्राप्त भएको छ।
बाढीले घर तथा भौतिक संरचनामा ठूलो क्षति पुर्याए पनि हालसम्म मानवीय क्षति भएको विवरण प्राप्त भएको छैन। जोखिम बढेपछि बस्तीमा रहेका सबै स्थानीयवासीलाई सुरक्षित स्थानमा स्थानान्तरण गरिएको प्रहरीले जनाएको छ।
कालीगण्डकी नदीमा पानीको बहाव बढ्नुका साथै आसपासको क्षेत्रमा पहिरोसमेत गएको कारण उद्धार तथा क्षतिको विवरण संकलनमा कठिनाइ भएको बताइएको छ। पहिरोका कारण प्रहरी टोली तत्काल घटनास्थलसम्म पुग्न नसकेको प्रहरीले जनाएको छ।
घटनास्थल पर्वतको प्रहरी चौकी मिलनचोकबाट करिब ६ किलोमिटर पूर्वमा पर्दछ। सडक तथा बाटोमा पहिरोका कारण आवागमन प्रभावित भएकाले सुरक्षाकर्मीलाई घटनास्थल पुग्न समस्या भएको हो।
बाढीका कारण थप घरहरू जोखिममा रहेकाले स्थानीयवासीलाई सुरक्षित स्थानमा राखिएको छ। घटनास्थलको वास्तविक अवस्था, थप क्षतिको विवरण तथा उद्धार कार्यबारे थप जानकारी आउन बाँकी रहेको प्रहरीले जनाएको छ।
स्थानीय प्रशासन, सुरक्षा निकाय तथा सम्बन्धित निकायबाट घटनास्थलको अवस्था बुझ्ने र आवश्यक उद्धार तथा राहत व्यवस्थापनको तयारी भइरहेको बताइएको छ।
थप विवरण प्राप्त हुन बाँकी छ।