रसुवामा आएको बाढी तथा विपद्का कारण विभिन्न प्रहरी कार्यालयमा कार्यरत प्रहरी कर्मचारीहरू प्रभावित भएका छन्। उपलब्ध विवरणअनुसार जिल्लाका विभिन्न प्रहरी चौकी तथा कार्यालयमा कार्यरत केही प्रहरी विदामा रहेका छन् भने ठूलो संख्या सम्पर्कविहीन अवस्थामा रहेको उल्लेख छ।
विवरणअनुसार प्रहरी चौकी रसुवागढीमा कार्यरत ९ जनामध्ये १ जना विदामा र ८ जना सम्पर्कविहीन छन्। त्यस्तै इलाका प्रहरी कार्यालय दिमुरेमा कार्यरत २३ जनामध्ये ३ जना विदामा र १० जना सम्पर्कविहीन रहेको विवरणमा उल्लेख छ।
त्यसैगरी प्रहरी चौकी स्याफ्रुबेंसीमा कार्यरत ८ जनामध्ये ३ जना सम्पर्कविहीन रहेको जनाइएको छ। प्रहरी चौकी हाकुमा कार्यरत ६ जनामध्ये केही प्रहरी सम्पर्कविहीन रहेको विवरणमा उल्लेख छ।
यस्तै, अस्थायी प्रहरी पोस्ट मेलुङमा कार्यरत ८ जनामध्ये ५ जना सम्पर्कविहीन रहेको देखिन्छ।
यसैबीच प्रहरी चौकी बैत्रावती, रसुवामा बाढीको सूचना माइकिङ गर्ने क्रममा प्रहरी बगेको विवरणसमेत उल्लेख गरिएको छ। उक्त घटनामा प्रहरी सहायक निरीक्षक रामकाजी पौडेलको शव फेला परी सनाखत भएको जनाइएको छ।
बाढीपछि सम्पर्कविहीन रहेका प्रहरी कर्मचारीहरूको अवस्था अझै यकिन हुन नसकेको देखिन्छ। उनीहरूको खोजी तथा अवस्थाबारे थप विवरण आउन बाँकी छ।